Licha ya usajili mkubwa uliofanywa na Yanga katika dirisha hili, ni wazi nyota wapya watakuwa na kazi ya kufanya kujihakikishia nafasi ya kucheza katika kikosi cha kwanza
Ushindani unatarajiwa kuwa mkali zaidi katika eneo la kiungo ambalo Yanga imeongeza silaha za maana
Viungo Mohammed Abdallah 'Casemiro', Moussa Balla Conte, Mohamed Doumbia na Lassine Kouma wametua katika eneo hilo ambalo msimu uliopita Mudathir Yahya, Duke Abuya na Maxi Nzengeli walitamba wakati Stephane Aziz Ki na Khalid Aucho wakiondoka
Juzi katika mchezo wa ufunguzi wa michuano ya CHAN kati ya Tanzania dhidi ya Burkina Faso, Mudathir aliwaonyesha nyota hao wapya ni kwa kiasi gani wanakabiliwa na kazi kubwa kumnyan'ganya nafasi yake katika kikosi cha kwanza
Katika mchezo huo Mudathir alitumika kama kiungo namba 8, alihusika katika mabao yote mawili yaliyofungwa na Stars ambapo pasi yake kwa Clement Mzize ilipelekea mkwaju wa penati kabla ya kutoa pasi maridadi kwa Idd Nado aliyepiga krosi iliyojazwa kimiani na Mohamed Hussein 'Zimbwe Jr' anayesubiri utambulisho Yanga
Nafasi ya Duke Abuya nayo ni moto kwani kiungo huyo kutoka Kenya alimaliza msimu uliopita kibabe na pengine anaweza kuwa sababu ya Yanga kuachana na Aucho. Kwani Abuya yuko fit wakati wote, ni nadra kumuona akiwa nje kutokana na majeraha.
Maxi Nzengeli ni mchezaji mwingine kiraka ambaye sio rahisi kumuweka nje. Mara nyingi kabla ya msimu kuanza unaweza usiione nafasi ya Maxi kikosini lakini pale msimu unapoanza utamuona katika kikosi cha kwanza
Ni aina ya mchezaji ambaye kazi anayoifanya uwanjani hakuna kocha atakuwa tayari kumuweka nje pale anapokuwa fit
Kocha Romain Folz na benchi lake la ufundi watakuwa na kazi katika kuchagua wachezaji wa kuwatumia katika kila mechi
Kwani kila idala Yanga imesheheni wachezaji mahiri ambao wanaweza kutumika katika mchezo wowote
