Katika kipindi hiki cha usajili, jina la Mohammed Hussein 'Zimbwe Jr' limeibuka kwenye vichwa vya habari baada ya tetesi kuhusisha beki huyo wa Simba SC kutakiwa na Yanga.
Tetesi za usajili wake zimeibua mjadala mkubwa huku baadhi wakiona kama hatua sahihi kwa Yanga, na wengine wakibeza wakihusisha suala la umri na historia ya mchezaji huyo ndani ya Simba.
Lakini kiuhalisia, Yanga inaweza kunufaika endapo itamsajili Zimbwe Jr, hasa ikizingatiwa sababu kadhaa:
1. Umri wa Ushindani
Wapo wanaobeza wakidai umri wa Zimbwe Jr ni mkubwa, lakini ukweli ni kwamba akiwa na miaka 28, bado ana uwezo wa kucheza soka la ushindani kwa misimu minne hadi mitano ijayo. Kwa nafasi ya beki, umri huo hauwezi kuhesabiwa kama kikwazo, hasa kwa mchezaji mwenye nidhamu na uwezo wa kudumu uwanjani.
2. Mchezaji Huru
Kwa sasa, Zimbwe Jr ni mchezaji huru baada ya mkataba wake na Simba kumalizika. Hii inaipa Yanga nafasi ya kumsajili bila gharama kubwa, tofauti na wachezaji walio kwenye mikataba kama Paschal Msindo wa Azam FC. Kwa timu yoyote inayotaka kuongeza nguvu pasipo kuingia gharama kubwa za ada ya uhamisho, hii ni fursa adimu.
3. Uzoefu wa Kimataifa
Yanga ina malengo makubwa zaidi kwenye mashindano ya kimataifa kama Ligi ya Mabingwa Afrika. Uzoefu wa Zimbwe Jr katika mashindano hayo akiwa na Simba pamoja na Taifa Stars ni jambo linaloweza kuisaidia Yanga. Uwepo wake unaweza kuongeza uimara na utulivu kwenye safu ya ulinzi, hasa kwenye mechi kubwa za kimataifa.
4. Upungufu Kwenye Nafasi ya Beki wa Kushoto
Taarifa zinaonyesha Yanga inasaka beki wa kushoto wa ndani kuongeza ushindani kwenye nafasi hiyo, akisaidiana na Chadrack Boka. Nickson Kibabage anaweza kuondoka kujiunga na Singida Black Stars. Hii inaipa Yanga sababu ya kutafuta mchezaji aliyekomaa kama Zimbwe Jr, ili kuongeza kina kwenye kikosi.
5. Sababu ya Soko la Ndani
Yanga imekuwa ikikumbwa na ugumu wa kupata wachezaji wa ndani katika nafasi ya ulinzi upande wa kushoto. Wachezaji wenye kiwango kizuri kama Msindo wa Azam Fc bado wako kwenye mikataba. Azam haitoi wachezaji wake kirahisi, hasa kwa Yanga na ni hivyo hivyo upande wa pili, mnakumbuka masakata ya Feisal Salum na Prince Dube. Katika hali kama hiyo, kusajili mchezaji huru kama Zimbwe Jr ni hatua ya kiakili.
Kwa kuangalia hali ya soko, mahitaji ya timu na uzoefu wa mchezaji mwenyewe, Zimbwe Jr anaweza kuwa usajili wa maana kwa Yanga. Anaweza isiwe sajili ya "kupendeza macho ya mashabiki", lakini kiufundi na kwa mahitaji ya sasa ya timu, usajili wake unaweza kuongeza ushindani na utulivu kwenye safu ya ulinzi upande wa kushoto.
