Mwandila aitaka Yanga ijipange, aeleza umuhimu wa kocha Mkuu kukaa kwenye benchi

Kaimu Kocha Mkuu wa Yanga Noel Mwandila amesema kukosekana kwa kocha Mkuu kwenye benchi la ufundi huenda kukawa kumeigharimu Yanga kupata matokeo kwenye mchezo wa jana dhidi ya Rayon Sports.

Akizungumza baada ya mchezo wa jana ambao ulimalizika kwa suluhu ya bila kufungana, Mwandila amesema licha ya kuwa walikuwa wakiwasiliana na kocha huyo aliyekuwa jukwaani wakati mchezo ukiendelea, lakini uwepo wake kwenye benchi ulihitajika zaidi.

Wengi wamekosoa mabadiliko yaliyofanywa na benchi la ufundi jana hasa kumtoa Kamusoko aliyekuwa akijitahidi kuichezesha timu.

Mwandila na Shedrack Nsajigwa ndio waliokaa kwenye benchi na mara kwa mara walionekana wakijadiliana juu ya nini kifanyike wakati mchezo ukiendelea.

Hakuna sababu zaidi iliyotolewa na uongozi wa Yanga zaidi ya kueleza kuwa kocha Mwinyi Zahera anasubiri kukamilika kwa vibali vyake.