Baada ya Kocha Miloud Hamdi kuondoka akijiunga na Ismailia kama Mkuguenzi wa ufundi wa klabu hiyo inayoshiriki ligi kuu ya Misri, jina la kocha mahiri kutoka Afrika Kusini, Rulani Mokwena limerejea tena katika viunga vya Jangwani
Taarifa za kuaminika kutoka ndani ya uongozi wa Yanga, zimethibitisha kuwa Rais wa Yanga, Injinia Hersi Said alifanya mazungumzo na Mokwena ambaye kwa sasa bado hana timu baada ya kuachana na Wydad
Yanga ikiwa na malengo makubwa ya kufanya vyema katika michuano ya ligi ya mabingwa msimu ujao, inahitaji kocha aina ya Mokwena ambaye ana uzoefu mkubwa wa kucheza hatua za robo fainali, nusu fainali na hata fainali wakati akiwa na Mamelodi
Ingawa muda wake na Wydad ulikuwa mfupi, aliisaidia klabu hiyo kumaliza katika nafasi ya tatu kwenye ligi ya Morocco na kufuzu CAF Confederation Cup (CAF CC), hatua ambayo inachukuliwa kama mafanikio ukizingatia hali ya awali ya klabu hiyo kabla ya kuwasili kwake.
Kuja kwa kocha kama Mokwena ambaye ana rekodi inayovutia hasa wakati yuko Mamelodi, kunaweza kuwa hatua madhubuti ya kuimarisha kikosi kuelekea kufanikisha malengo ya klabu
Wapo wenye wasiwasi kama Yanga itaweza kumlipa Mokwena? lakini wakati mwingine makocha hawaangalii maslahi pekee, bali pia miundombinu na mfumo wa kiutendaji ndani ya klabu.
Katika moja ya mahojiano yake, Mokwena alifichua kuwa Wydad hawakumlipa mshahara kwa miezi kadhaa na mpaka sasa anawadai. Kuna wakati alilazimika kuwalipa baadhi ya watu wake katika benchi la ufundi kutokana na ukata ulioikumba Wydad
Yanga ina uchumi wa wastani pia ikiwa miongoni mwa klabu chache zinazoendeshwa kisasa barani Afrika. Sasa ina uwezo wa kusajili wachezaji bora na mazingira yake yanaweza kumshawishi kocha yeyote kujiunga nayo
Mokwena anaweza kuwa alama mpya ya mabadiliko makubwa, hasa katika kuhakikisha timu inavuka hatua ya makundi ya Ligi ya Mabingwa na kupata mafanikio makubwa zaidi kuliko miaka ya nyuma.
