Jeshi la Polisi Kanda Maalum ya Dar es Salaam limeimarisha ulinzi na usalama kuelekea mechi ya watani wa jadi kati ya Yanga SC na Simba SC itakayopigwa kesho, Jumatano Juni 25, 2025, katika Uwanja wa Benjamin Mkapa.
Kamanda wa Polisi Kanda Maalum ya Dar es Salaam, Jumanne Murilo, amewatoa hofu wananchi na mashabiki wa soka kwa kuwataka wajitokeze kwa wingi kushuhudia mchezo huo huku wakizingatia sheria na taratibu. Amewahakikishia usalama wa kutosha kabla, wakati na baada ya mchezo huo muhimu wa Ligi Kuu ya NBC.
Kamanda Murilo ametoa onyo kali kwa watu wenye nia ya kuvuruga amani katika mchezo huo wa dabi maarufu ya Kariakoo, akisema kuwa vyombo vya dola vimejiandaa kikamilifu kuhakikisha wahalifu wanakamatwa na kuchukuliwa hatua stahiki.
“Hatutavumilia mtu yeyote atakayejihusisha na vitendo vya kihalifu au uchochezi. Tuna vikosi vya kutosha uwanjani na maeneo ya jirani kuhakikisha kila kitu kinaenda salama. Wale wenye nia ya kuleta vurugu, wasithubutu kufika uwanjani,” amesema Kamanda Murilo.
Mchezo huu wa raundi ya pili wa Ligi Kuu, namba 184 ni wa kuamua bingwa wa msimu wa 2024/2025, huku Yanga wakiwa wenyeji wa pambano hilo linalosubiriwa kwa hamu kubwa.
Mara baada ya mechi hiyo, sherehe za kukabidhi kombe kwa bingwa wa ligi zitafanyika uwanjani hapo
Jeshi la Polisi limewataka mashabiki limewataka mashabiki kufuata miongozo ya usalama, na kushirikiana na vyombo vya dola katika kuhakikisha mazingira ya mchezo yanabaki kuwa salama kwa wote.
