Mpango wa mshambuliaji wa Yanga, Clement Mzize, kujiunga na miamba ya soka ya Misri, Zamalek SC, umeingia dosari dakika za lala salama kufuatia mvutano kutoka upande wa wakala wa mchezaji huyo.
Kwa mujibu wa taarifa kutoka ndani ya duru za usajili, Yanga na Zamalek walikuwa wamefikia hatua nzuri ya mazungumzo kuhusu uhamisho wa Mzize. Klabu hizo mbili zimekuwa zikijadiliana kwa wiki kadhaa na tayari walikuwa wameafikiana juu ya dau la usajili.
Hata hivyo, mambo yamekwama ghafla baada ya wakala wa Mzize, Jasmine Razack, kudai masharti ya ziada yanayodaiwa kuwa nje ya mipaka ya makubaliano ya awali. Zamalek wameamua kusitisha mchakato wa usajili kwa muda hadi sintofahamu hiyo itakapopatiwa ufumbuzi.
Jasmine Razack si jina geni katika mijadala ya soka ya Tanzania. Ametajwa mara kadhaa kuwa na mvutano na klabu ya Yanga, licha ya kuwahi kuwasimamia wachezaji kadhaa waliowahi kuichezea timu hiyo kama Fiston Mayele, Feisal "Fei Toto" Salum, na Jean Baleke – ambaye hata hivyo alilazimika kuachana na wakala huyo ili kuhitimisha uhamisho wake kwenda Jangwani.
Mzize, mwenye umri wa miaka 21, ameonyesha kiwango kizuri msimu huu, hali iliyowavutia vigogo mbalimbali wa Afrika. Yanga, ingawa bado ina mkataba wa miaka miwili na mchezaji huyo, imekuwa wazi kuhusu utayari wake wa kupokea ofa zinazomfaa mchezaji na klabu pia.
