Mwenyekiti wa Baraza la Wazee Yanga Mohamed Msumi amejibu kauli ya Mwenyekiti wa Bodi ya ligi, Steven Mguto aliyesema kuwa mechi ya namba 184 kati ya Yanga dhidi ya Simba iliyopangwa kupigwa June 15 iko pale pale
Juzi akizungumza na wanahabari baada ya mchezo wa ligi kuu kati ya Simba dhidi ya Singida BS, Mguto alisema bodi tayari imetangaza tarehe ya mchezo huo na hivyo hawayumbishwi na kauli zinazotolewa na viongozi wa Yanga kuwa Hawachezi
Mzee Msumi amesema bado bodi haijajibu madai yote yaliyotolewa na Yanga hivyo msimamo wao Wazee uko palepale, hawataruhusu viongozi wa Yanga kupeleka timu uwanjani
"Mpaka sasa bodi ya Ligi haijajitokeza hadharani na kujibu kwanza hoja tatu za Yanga, hivyo haitawezekana kwa wazee wa klabu kukubaliana na uamuzi wowote"
"Kwanza hatumtambui Steven Mguto kuwa mwenyekiti wa bodi ya ligi kwakuwa alishapoteza uhalali , kwani Mguto anawakilisha klabu gani ? Coastal Union tayari wana Mwenyekiti wao sasa yeye anawakilisha klabu gani?," alihoji Mzee Msumi
Katika miongoni mwa hoja zilizotolewa na Yanga, waliitaka Bodi ya ligi kuelezea sababu zilizopelekea waahirishe mchezo huo uliopaswa kupigwa March 08. Taarifa yao ya awali ilieleza wanachunguza mambo mbalimbali lakini badala yake Bodi imeupangia mchezo huo tarehe mpya bila kutoa majibu ya uchunguzi wao
