Winga wa Azam FC Gibril Sillah katika mahojiano yake ya awali aliwahi kueleza wazi kuwa anatamani siku moja kucheza pamoja na nyota wa Yanga kama Pacome Zouzoua, Stephane Aziz Ki (ambaye sasa yuko Wydad), na Prince Dube aliyewahi kuwa mchezaji mwenzake Azam FC.
Inadaiwa kuwa mkataba wa Sillah na Azam FC unakaribia kufikia mwisho msimu huu, na hadi sasa hajatia saini mkataba mpya na klabu hiyo ya Chamazi.
Mpaka sasa, Yanga bado haijaonyesha nia ya kumsajili winga huyo licha ya kwamba Sillah amewafunga Wananchi mara tatu kwenye mechi mbalimbali za ligi, akithibitisha uwezo wake uwanjani.
Meneja wa Habari na Mawasiliano wa Yanga, Ali Kamwe, amesema kwa fahari kuwa kwa sasa kila mchezaji hapa nchini anatamani kuichezea Yanga.
"Sio huyo tu, wachezaji wengi wameomba kusajiliwa Yanga. Tukiamua kuweka majina yao hadharani, kila mtu atashangaa," alisema Kamwe.
"Ni kwa sababu kwa sasa Yanga ndiyo klabu kubwa Tanzania. Tunalipa mishahara mizuri, bonasi, na malipo yote hufanyika kwa wakati."
"Pongezi za kipekee anastahili Rais wa Yanga, Mhandisi Hersi Said, kwa kutengeneza mazingira haya, kila mmoja anakumbuka tulivyoteseka miaka ya nyuma" aliongeza Kamwe kwa kujiamini.
Kamwe pia alidokeza kuwa Yanga ina mpango wa kuitembelea Azam FC mara tu dirisha la usajili litakapofunguliwa!
