Mshambuliaji chipukizi wa Yanga SC, Clement Mzize, anaendelea kuwa kivutio kikuu barani Afrika huku klabu kubwa zikigongana kuiwania saini yake. Zamalek ya Misri imejiunga rasmi na mbio za kumuwania nyota huyo mwenye umri wa miaka 21, ikifuata nyayo za Al Ittihad ya Libya na JS Kabylie kutoka Algeria, ambazo tayari zimewasilisha ofa mezani.
Mbali na klabu hizo za Afrika Kaskazini, taarifa zinaeleza kuwa Mzize pia anawindwa na klabu moja inayoshiriki Ligi Kuu ya Ufaransa (Ligue 1), jambo linaloashiria kuwa kijana huyo ana mustakabali mzuri nje ya mipaka ya Tanzania.
Kwa mujibu wa vyanzo vya karibu na klabu ya Yanga, uongozi umeonyesha utayari wa kumuachia mshambuliaji huyo, wakitambua kuwa huu ndio wakati sahihi kwake kwenda kujaribu bahati yake kimataifa. Mzize ameonyesha ukuaji mkubwa katika miaka mitatu aliyochezea kikosi cha kwanza cha Yanga baada ya kupandishwa kutoka timu ya vijana ya U20.
Licha ya kuwa na mkataba unaoendelea kwa miaka miwili zaidi, uhamisho wake unatarajiwa kuingizia klabu ya Yanga fedha nzuri, jambo ambalo linaweza kusaidia katika usajili wa wachezaji wapya au kuimarisha miundombinu ya klabu hiyo.
Msimu huu wa Ligi Kuu ya NBC, Mzize amekuwa moto wa kuotea mbali, akifunga mabao 13 na kutoa pasi za mwisho (assists) 4, akichangia pakubwa mafanikio ya Wananchi katika kampeni yao ya kutetea taji la ligi.
Endapo dili lake litatimia, Mzize atakuwa mmoja wa vijana wachache wa Kitanzania waliotoka moja kwa moja kutoka Ligi Kuu ya Tanzania Bara hadi moja ya ligi kubwa barani Afrika au hata Ulaya — hatua ambayo inaweza kufungua milango kwa vipaji vingine nchini.
