Kocha Mkuu wa Yanga Miloud Hamdi amesema hakuna nafasi ya kufanya makosa katika mchezo wa nusu fainali kombe la CRDB dhidi ya JKT Tanzania hivyo wataingia katika mchezo huo wakiwa na kikosi kamili
Kesho Jumapili Yanga itashuka uwanja wa Mkwakwani, Tanga kumenyana na JKT Tanzania katika mchezo ambao Wananchi wanawania ushindi kutinga fainali ili kuwa na nafasi ya kutetea ubingwa wao kwa msimu wa nne mfululizo
Akizungumza katika mkutano na wanahabari mapema leo, Hamdi amesema atatumia wachezaji ambao wako fit kwa asilimia 100 ili kuhakikisha wanashinda
"Ni lazima tuingie katika mchezo huu tukiwa kamili kwa sababu hatutaki kukutana na matokeo ya kutuvunja moyo"
"Tunataka kushinda ili tuingie fainali hivyo nitakwenda kuweka kikosi imara. Nitatumia wachezaji ambao wako timamu kwa asilimia 100"
"Ninasema hivi kwa sababu hatuna chaguo jingine, hatutaki kukutana na 'surprise'," alisema Hamdi
Kikosi cha Yanga kilitua Tanga jana ambapo leo wachezaji watapata nafasi ya kufanya mazoezi katika uwanja wa Mkwakwani ambao utatumika hapo kesho
