Uongozi wa Yanga unaelewa fika kuwa kupinga kucheza mchezo namba 184 dhidi ya Simba kunaweza kuigharimu klabu alama 15 na hata kushushwa daraja. Huu ni ukweli ulioandikwa kwenye kanuni za mashindano. Lakini wakati mwingine, gharama ya kukaa kimya mbele ya dhuluma ni kubwa zaidi kuliko adhabu yoyote ile ya kwenye karatasi.
Yanga imekwishapitia hatua ya kisheria kupitia Mahakama ya Usuluhishi wa Michezo (CAS), ambapo imeshaelekezwa kurudi kwenye vyombo vya ndani ya nchi—TFF na Bodi ya Ligi—ambavyo vina historia ya kutuhumiwa kwa upendeleo na kushindwa kusimamia haki kwa usawa. Huu ni mzunguko wa kutisha wa kutafuta haki kwa waliowahi kuikataa hapo awali.
Kupigania Haki, Si Dharau
Hatua ya Yanga kutangaza kutoshiriki mchezo dhidi ya Simba si dharau kwa mashindano, bali ni kilio cha haki kinachotolewa mbele ya umma kwa njia ya amani. Yanga haijawahi na haitakuwa klabu ya kukubali uonevu uliohalalishwa kwa minajili ya kulinda maslahi ya klabu fulani. Kitendo cha Simba kugomea mchezo wa awali (Machi 8) kilikuwa wazi kinyume na kanuni. Badala ya kuchukuliwa hatua stahiki, mamlaka ziliamua kuwalinda na kujenga mazingira ya mgogoro huu unaozidi kuharibu sura ya Ligi Kuu.
Hili Halikuwa Jambo la CAS – Kanuni Zinajitosheleza
Inasikitisha kuona suala ambalo lilipaswa kutatuliwa kwa kutumia kanuni zilizopo linageuzwa kuwa mjadala wa kisiasa na ushabiki. Ni wazi kuwa CAS haikuhitajika kama Bodi ya Ligi na TFF wangekuwa wakweli na waaminifu katika kutafsiri na kutekeleza sheria zao wenyewe. Lakini kwa kuwa upendeleo sasa umegeuka kuwa mfumo rasmi, ni lazima msimamo wa dhati uchukuliwe.
Yanga, Historia ya Mapambano
Tangu enzi za harakati za ukombozi wa Tanganyika, Yanga imekuwa mstari wa mbele katika mapambano ya haki, usawa, na utu. Huu si wakati wa kuyumbishwa kwa vitisho vya kushushwa daraja au kupokonywa alama. Huu ni wakati wa kusimama kama taasisi inayowakilisha maelfu ya wananchi waliokata tamaa na mfumo wa sasa wa soka letu.
Simama Yanga – Simama Kwenye Ukweli
Tunakataa kuwa sehemu ya mashindano yenye kivuli cha upangaji, ubaguzi wa kiutawala, na uonevu. Tunapigania haki sio tu kwa Yanga, bali kwa kila klabu inayotaka kuona ushindani wa kweli ukirejea katika ligi yetu. Tusipozuia sasa, tutaendelea kuwa watazamaji wa soka lililopoteza uhalali wake.
Yanga imetangaza haitacheza mchezo namba 184 hadi haki itendeke. Huu ni msimamo. Huu ni wito wa kihistoria
