Tumekubali kushindwa msimu huu, tunajipanga kwa msimu ujao - Mkwasa

Baada ya jana Yanga kuuvua rasmi ubingwa uliotwaliwa na wapinzani wao Simba, Katibu wake Mkuu Charles Mkwasa amesema wamekubali kushindwa msimu huu na sasa wanajipanga kwa ajili ya msimu ujao.

Mkwasa amesema kama viongozi wametambua makosa waliyofanya ambayo yamepelekea kufanya vibaya msimu huu na watahakikisha hayajirudii msimu ujao.

"Siwezi kuwasemea wala kuwaambia chochote Simba kwa sababu siku zote adui yako mwombee njaa. Siwezi kusema lolote kwa sababu wenzetu wameanza vizuri, pesa wamezitumia vizuri sisi tumetereza tunakubali yaishe," Mkwasa aliuambia mtandao wa ShaffihDauda.

"Haya ni mashindano ya mwaka mmoja mwaka mwingine yanaanza tena lakini naamini makosa yaliyofanyika Yanga mwaka huu hayawezi kujirudia tena mwaka ujao. Tunaamini mwakani tukiwa na afya njema tutarudi kwenye nafasi yetu."

"Kuna msemo wa Kiswahili unasema ‘kufanya kosa si kosa, kosa ni kurudia kosa’ kwa hiyo tunakubali kuna makosa ambayo yamefanyika, tumekuwa na wachezaji wenye majeruhi ya muda mrefu tangu tumeanza ligi hatukuwa na mwanzo mzuri tumekuwa tukipata ushindi finyu lakini ndio mwendo wa safari.

"Tunakubali matokeo, tunajipanga kwa ajili ya mwakani"

Yanga iko nafasi ya tatu kwenye msimamo wa ligi ikiwa na alama 48 na michezo mitano mkononi.

Baada ya kipigo cha mabao 2-0 kutoka Prisons jana, Yanga iliutema rasmi ubingwa ilioushikilia kwa misimu mitatu mfululizo.