Kiungo wa Yanga Khalid Aucho amepata majeraha wakati akiwa kwenye majukumu ya timu ya Taifa ya Uganda
Aucho ambaye ni nahodha wa Uganda Cranes alikosa mchezo wa kuwania kufuzu kombe la Dunia dhidi ya Guinea uliopigwa juzi jijini Kampala Uganda ikiibuka na ushindi wa bao 1-0
Aucho alipata jeraha la misuli wakati wa maandalizi kuelekea mchezo huo na hivyo kumuweka kwenye hatihati ya kukosa mchezo wa ligi kuu dhidi ya Tabora United utakaopigwa April 1 huko Tabora.
Kocha Mkuu wa Yanga Miloud Hamdi amekiri licha ya kuwa machaguo mengine katika eneo la kiungo, Aucho amekuwa na mchango mkubwa zaidi
Hamdi amesema anatamani kuona wachezaji wake wote wanarejea kutoka majukumu ya timu za Taifa wakiwa salama kwani anamuhitaji kila mchezaji katika nyakati hizi ambazo msimu unaelekea mwisho
"Bado tunapambana katika mbio za ubingwa wa ligi, hivyo mimi kama kocha natamani mastaa wangu wote wawe timamu ili niweze kuwa na kikosi kipana zaidi"
"Yanga ina wachezaji bora, ila kumkosa kiungo kama Aucho ni changamoto, kwani pengo lake sio rahisi kuzibika, licha ya wachezaji wenzake kuwa na bora pia," alisema
Viungo Duke Abuya na Salum Abubakar wametumika kwa nyakati tofauti pale Aucho anapokosekana
Msimu huu Aucho amekosa mechi tatu tu za ligi kuu ya NBC akicheza mechi 19 kati ya 22
