Tatizo ni timu, sio mchezaji mmoja mmoja

Mchezo wa jana dhidi ya USM Alger umedhihirisha madhaifu ya kikosi cha Yanga hasa katika umiliki wa mpira kwenye michezo yenye presha kubwa.

Kwa muda mwingi USM Alger ilikuwa imeweka kambi kwenye lango la Yanga kwa kuwa ilikuwa vigumu kwa wachezaji wa Yanga kutunza mpira hata kwa sekunde 15.

Yanga ilipiga mashuti mawili pekee kwenye lango la USM wakati waarabu hao walipiga mashuti 19 langoni kwa Yanga.

Iko hivi, kadiri unavyomkaribisha mpinzani kwenye lango lako unaongeza uwezekano wa wewe kufanya makosa na kufungwa.

Kumlaumu mlinda lango Youthe Rostand kuwa alifanya makosa ya kizembe haiwezi kuwa sawa kwani presha ya mchezo ilikuwa ni kubwa.

Rostand amekuwa akiibeba Yanga kwenye michezo mingi tu, kufungwa kwake mabao manne hakutokani na udhaifu wake, bali ni udhaifu wa timu kwa ujumla.

Ndio, anayo makosa yake kama mlinda lango lakini yeye hawezi kuwa sababu pekee ya Yanga kufungwa jana.

Kama Yanga ingepunguza mashambulizi langoni mwake ni dhahiri ingepunguza uwezekano wa kufanya makosa.

Njia sahihi ya kujilinda ni kumuweka mbali ya lango mpinzani wako kwa kumshambulia yeye na sio kumpa nafasi ya kukushambulia kwa muda mrefu kama ilivyokuwa jana.

Kwa ujumla Yanga ilishindwa kwenda na kasi ya USM Alger.

Waarabu hao wangeweza kufunga zaidi ya mabao manne kama washambuliaji wake wangekuwa makini.