Ukiiangalia ratiba ya Yanga kwa undani ni kama kuna 'mitego' wametegewa Wananchi ili angalau wadondoshe alama katika mechi zao zinazofuatana
Baada ya 'kuvuka salama' katika mechi ya Derby dhidi ya Simba ambayo ilikuwa 'mtego' kwa Wananchi waliokuwa na wachezaji wengi katika timu za Taifa, mchezo uliofuata dhidi ya JKT Tanzania nao Wananchi wakaruka kihunzi
Leo wako uwanja wa Sheikh Amri Abeid kuikabili Coastal Union katika mchezo mwingine mgumu
Meneja wa Habari na Mawasiliano wa Yanga Ali Kamwe amewataka mashabiki kujitokeza kwa wingi ili kuwaongezea wachezaji wao ari ya kupambana
Kamwe amesema kuna watu hawapendi kuona Yanga inashinda kila mechi lakini watahakikisha wanaendeleza vipigo
"Niwaambie mashabiki wetu mje kwa wingi uwanja wa Sheikh Amri Abeid, nafahamu kuna watu hawapendi hivi tunavyoshinda kila siku lakini kwa umoja wetu, hawatatuzuia"
"Kama tutaweza kushinda mechi zote zinazofuata katika ratiba yetu, basi tutasafisha njia yetu kuelekea ubingwa wa nne mfululizo mapema," alisema Kamwe
Baada ya mchezo dhidi ya Coastal Union leo, Yanga inapaswa kusafiri kuelekea visiwani Zanzibar kuikabili Singida BS Oktoba 30 katika uwanja wa New Amaan Complex
Siku tatu baadae Yanga inapaswa kurejea Dar es salaam kuchuana na Azam Fc Novemba 02
Kama sio upana wa kikosi cha Yanga, isingekuwa rahisi kucheza mechi hizi ngumu mfululizo lakini vijana wa kocha Miguel Gamondi watapambana na bila shaka 'watatoboa'
