Kikosi cha Yanga kinaendelea na maandalizi kuelekea mchezo wa ligi kuu dhidi ya Simba utakaopigwa Jumamosi, Oktoba 19 katika uwanja wa Benjamin Mkapa
Habari njema kwa Yanga ni kuwa nyota wote waliokuwa na majukumu ya timu za Taifa, wanakamilisha majukumu yao leo na kesho Jumatano wanatarajiwa kuripoti Avic Town kwa ajili ya maandalizi ya mwisho
Meneja wa Yanga Walter Harrison amesema wachezaji ambao hawakuwa na majukumu ya timu za Taifa wamekuwa na muda mzuri wa kujiandaa na mchezo huo huku akiamini wale walioko timu za Taifa nao wamepata program nzuri za mazoezi
"Maandalizi yanaendelea vizuri kwa sehemu ya kikosi ambacho kiko Dar es Salaam, kama mnavyojua tuna kundi kubwa la wachezaji ambao wapo kwenye vikosi vya timu ya taifa, ila tunaamini kuwa wapo kwenye mikono salama na wanaendelea na maandalizi kuelekea kwenye michezo yao"
"Tunategemea wote watakuwa wamefika kambini Oktoba 16, kuelekea katika mchezo huo mkubwa na tarehe 17 na 18, siku hizo mbili tunazitumia kuwaweka vizuri kimwili na kiakili kwa ajili ya mchezo huo," alisema Harrison
Harrison amekiri changamoto ya ratiba kutokana na ukaribu wa mechi hiyo baada ya mechi za Kimataifa lakini matarajio yao ni kuwa wachezaji wote watarejea wakiwa salama kuweza kushiriki mchezo huo kikamilifu
"Ukiangalia ratiba ilivyo, na hawa wachezaji walio kwenye vikosi vya timu za taifa, hujui watarejea kwenye hali gani kiafya na kimwili, hivyo huwezi kutegemea nini kitatokea, lakini sisi tunaamini watarejea salama na tutakuwa kwenye wakati mzuri wa kukiandaa kikosi kuelekea kwenye mchezo huo muhimu kwetu kwani tunataka kuendeleza ushindi ili kuweza kuupata ubingwa mara ya nne mfululizo," alisema
