Kocha Mkuu wa Yanga Miguel Gamondi amesisitiza katika kila mechi lengo ni ushindi ili kupata alama tatu, bila ya kujali idadi ya mabao yanayofungwa
Msimu huu presha imekuwa kubwa kwa Wananchi ikichagizwa na mijadala inayoendeshwa na wachambuzi katika vipindi vya michezo wakiponda ushindi wa bao 1-0 ambao Yanga wamepata katika mechi mbili zilizopita dhidi ya Ken Gold na KMC
Gamondi ameshangazwa na mijadala hiyo ambayo inailenga zaidi ya Yanga licha ya ukweli katika ligi zipo mechi nyingi tu mshindi amefunga bao moja
"Jambo muhimu kwetu ni ushindi ili kupata alama tatu kwa sababu sio kila mechi tutafunga mabao mengi. Ukishinda bao 1 unapata alama tatu sawa sawa na ukishinda mabao mawili, matatu au zaidi"
"Yanga sio timu pekee iliyoshinda baadhi ya mechi kwa bao moja lakini mbona mjadala umeelekezwa kwetu tu?," alihoji Gamondi
Katika msimu uliopita kuna takribani mechi 11 Yanga iliibuka na ushindi wa tofauti ya bao moja
Mechi nane Yanga ilipata ushindi wa bao 1-0 wakati mechi tatu ilipata ushindi wa mabao 2-1
Lakini ikavunja rekodi kwa kutwaa ubingwa ikiwa na alama nyingi (80) katika mechi 30, kwa maana Wananchi walipoteza alama 10 msimu mzima
Msimu huu Yanga imeanza vyema kwa kushinda mechi zote tatu za mwanzo ikishinda 2-0 dhidi ya Kagera Sugar na 1-0 dhidi ya KMC na Ken Gold
