Akiwa katika msimu wa nne tangu ajiunge na Yanga, kiungo Mganda Khalid Aucho ameweka wazi kuwa hafikirii kuondoka Yanga karibuni
Akihojiwa chombo kimoja cha habari nchini Uganda alikorejea kwa ajili ya majukumu ya timu ya Taifa, Aucho alisema anajisikia furaha kuwa katika timu bora katika ukanda wa Afrika Mashariki
Aidha Aucho alibainisha kuwa mashabiki wa Yanga wana upendo mkubwa kwa wachezaji huku viongozi wa klabu wakihakikisha wanapata kila wanachostahili kwa wakati
"Nina furaha kucheza Yanga ndio maana nasema kwa sasa sifikii kuondoka kucheza sehemu nyingine labda itokee wenyewe waniambie basi imetosha"
"Hapa viongozi wanatujali sana wachezaji, kama ni mshahara tunalipwa kwa wakati, mashabiki wana upendo mkubwa kwa timu yao"
"Kiufupi mimi hapa nimefika, nitaendelea kupambana na kutoa mchango wake kwa timu hadi pale Rais wa klabu, Eng. Hersi, atakapoona imetosha," alisema Aucho
Tangu alipojiunga na Yanga mwaka 2021 akitokea klabu ya El Makas, Aucho amekuwa mchezaji muhimu katika kikosi cha Yanga akishinda mataji matatu ya ligi kuu, FA, Ngao mbili za Jamii huku akiwa sehemu ya kikosi kilichofanikiwa kutinga fainali ya CAF CC na robo fainali ya ligi ya mabingwa CAF CL
Mchezaji bora huyo wa mashabiki wa Yanga msimu uliopita, ni sahihi kusema ndiye injini ya Yanga katika eneo la kiungo
