Kocha Mkuu wa Yanga Miguel Gamondi amesema vijana wake wamewaonyesha Vital'o ukubwa wao na anaamini siku nyingine watakapokuja kucheza na Yanga wataweka heshima mbele
Gamondi alikerwa na kauli zilizotolewa na msemaji wa Vital'o Fc Arsene Bucuti katika mikutano yake na wanahabari kuelekea mchezo huo
Yanga iliibuka na ushindi wa mabao 4-0 katika mchezo huo wa mkondo wa kwanza hatua ya awali ya ligi ya mabingwa, ambapo kocha Gamondi amesema bado hawajamaliza, wanawasubiri tena uwanja wa Benjamin Mkapa kumalizana nao
"Vital'o walizungumza sana kabla ya mchezo, nafikiri ni muhimu kumuheshimu mpinzani wako. Tumewaonyesha sisi ni timu kubwa, mabingwa wa Tanzania. Mimi sikuwafahamu Vital'o kabla ya kukutana nao leo"
"Wachezaji wangu walicheza kwa ari na morali kubwa na niwaambie tu, katika mchezo wa marudiano uwanja wa Benjamin Mkapa tutacheza kwa nguvu zaidi kuliko mechi hii," alisema Gamondi
Baada ya mchezo Gamondi alionekana kuzungumza na msemaji wa Vital'o ambaye kitu pekee anachoweza kujivunia ni kupata umaarufu kutokana na 'mikwara' aliyotoa kabla ya mechi lakini ndani ya dimba, Vital'o hawakuwa na ubavu wa kushindana na Yanga
