Meneja wa Habari na Mawasiliano klabu ya Yanga Ali Kamwe amewataka wanachama na mashabiki wa timu hiyo kujitokeza kwa wingi uwanja wa Azam Complex siku ya Jumamosi katika mchezo wa hatua ya awali ligi ya mabingwa barani Afrika dhidi ya Vital'o ya Burundi
Kamwe amesema wanataka kuitumia mechi ya Jumamosi kukata tiketi ya kutinga raundi ya kwanza kwani katika mechi ya marudiano watafanya sherehe kubwa ya kukaribisha msimu katika uwanja wa Benjamin Mkapa
"Tumepata bahati wapinzani wetu Vital'o wamechagua kutumia uwanja wa Azam Complex kama uwanja wao wa nyumbani. Hivyo Jumamosi sisi tutakuwa ugenini Azam Complex na mechi yetu ya nyumbani itapigwa August 24 katika uwanja wa Benjamin Mkapa"
"Nawaomba mashabiki wetu waje kwa wingi uwanja wa Azam Complex kwani huu ndio mchezo wa kutupeleka hatua inayofuata katika michuano hii"
"Mechi yetu itakayopigwa uwanja wa Benjamin Mkapa tutaitumia kama sherehe ya kukaribisha msimu mpya wa michuano ya ligi ya mabingwa," alitamba Kamwe
Baada ya kutwaa Ngao ya Jamii, Yanga ilirejea mazoezini juzi kujiandaa na mchezo huo ambapo jana ilicheza mechi ya kujipima nguvu dhidi ya Green Worries na kuibuka na ushindi wa mabao 4-0 katika mchezo uliopigwa uwanja wa Avic Town
