Baada ya usajili wa washambuliaji Jean Baleke na Prince Dube, ilionekana kama chipukizi Clement Mzize atakuwa na wakati mgumu kupenya katika kikosi cha kwanza cha kocha Miguel Gamondi
Lakini kinyume na walivyotabiri wengi, Mzize amekuwa na mwanzo mzuri akianza katika mechi zote tatu za pre-season ambazo Yanga ilicheza Afrika Kusini
Katika mechi hizo, Mzize alifunga moja ya mabao ya Yanga kwenye ushindi wa mabao 4-0 dhidi ya Kaizer Chiefs na Wananchi kubeba Toyota Cup
Mzize alikuwa miongoni mwa wachezaji walion'gara katika mchezo dhidi ya Chiefs ambapo uwezo wake uliwashangaza hata mashabiki wa Chiefs ambao wamemtaja sana katika mjadala yao kwenye mitandao ya kijamii
Gamondi ameweka wazi kuwa Mzize ni miongoni mwa wachezaji muhimu katika kikosi chake na ataendelea kumpa nafasi
Akizungumza akiwa jijini Dar es Salaam baada ya kurejea kutoka Afrika Kusini, Gamondi alieleza kufurahishwa na kiwango kilichoonyeshwa na Mzize hasa katika mchezo dhidi ya Chiefs
"Mzize alikuwa na mechi nzuri dhidi ya Kaizer Chiefs, naamini atafanya makubwa zaidi msimu ujao, ameonyesha uwezo mkubwa, amekuwa na kasi na utulivu golini, ameendelea kukomaa naamini kama ataendelea kujituma atakuwa mchezaji muhimu sio kwa Yanga tu bali hata timu ya Taifa," alisema Gamondi
Mzize anapata nafasi ya kucheza mbele ya safu bora ya ushambuliaji ya Yanga inayoundwa na Dube, Baleke na Kennedy Musonda ambaye alichelewa kujiunga na wenzake kwenye pre-season kutokana na matatizo ya kifamilia
