Kile ambacho Yanga walifanya kwenye michuano ya ligi ya mabingwa barani Afrika msimu uliopita walipokwenda Rwanda kucheza na Al Merrikh, wamepanga kurudia tena watakapokwenda Burundi kumenyana na Vital'o katika hatua ya awali ya michuano hiyo msimu huu
Yanga itachuana na Vital'o August 17-18 nchini Burundi na mechi ya marudiano kupigwa wiki moja baadae jijini Dar es salaam
Meneja wa Habari na Mawasiliano wa Yanga Ali Kamwe amesema watafanya kampeni kubwa kuhakikisha mashabiki wanakwenda kwa wingi Burundi kama walivyofanya msimu uliopita walipokwenda Rwanda
"Droo tumeiona na tumefurahi sana kwani tutahakikisha tunakwenda kuweka rekodi Burundi kama tulivyofanya Rwanda msimu uliopita tulipokwenda kucheza na Al Merrikh"
"Maandalizi yetu yanaendelea vyema Avic Town, huu ni msimu mwingine ambao tumeweka malengo ya kufanya vizuri zaidi. Ni mechi za mtoano ambazo haupaswi kumdharau mpinzani wako"
"Akili yetu sasa inaziwaza dakika 180 hizi dhidi ya Vital'o, tukishamaliza ndipo tutaanza kuangalia mchezo unaofuata utakuwaje," alisema Kamwe
Kama Yanga itavuka hatua ya awali, raundi ya kwanza itachuana na mshindi kati ya SC Villa ya Uganda na Commercial Sports ya Ethiopia
