Uongozi wa Yanga unatarajiwa kutoa taarifa rasmi kuhusiana na ushiriki wao katika mashindano ya Klabu Bingwa Afrika Mashariki na Kati maarufu Kagame Cup yaliyopangwa kufanyika kuanzia Julai 6 hadi 22, mwaka huu hapa nchini
Mpaka jana Yanga ilikuwa haijathibitisha kushiriki michuano hiyo itakayofanyika kwenye viwanja vya Tanzania Bara na Zanzibar
Awali michuano hiyo ilipangwa kuanza Julai 19 lakini sasa imerejeshwa nyuma Julai 06 kipindi ambacho maandalizi ya msimu mpya wa mashindano yanatarajiwa kuanza
Wachezaji wa Yanga walipewa likizo ya mwezi mmoja na wanatarajiwa kurejea mwanzoni mwa Julai
Meneja wa Habari na Mawasiliano wa Yanga Ali Kamwe, amesema uongozi wa klabu hiyo utaweka hadharani uamuzi waliofikia kuhusu mashindano hayo hivi karibuni ili kila mwanachama afahamu mustakabali wao
"Uongozi unajiandaa kutoa tamko la klabu, wanachama na mashabiki watulie, tutatoa tamko letu rasmi kuhusiana na mashindano haya," alisema Kamwe
Katika Mkutano Mkuu wa Wanachama wa Yanga uliofanyika mwishoni mwa wiki iliyopita jijini Dar es salaam, Rais wa Yanga Injinia Hersi Said alisema klabu imepata mualiko wa kufanya pre-season katika nchi moja barani Ulaya
Ni wazi ratiba inaweza kuwa changamoto kwa upande wa Yanga kushiriki michuano hiyo
