Bado mashabiki wa Yanga hawajapoa na shamrashamra za ubingwa wa kombe la Shirikisho la CRDB ambao Yanga walitwaa juzi baada ya kuifunga Azam Fc mikwaju ya penati 6-5 kufuatia matokeo ya suluhu ya bila kufungana
Hilo lilikuwa taji la pili kwa Yanga kutwaa msimu huu baada ya lile la Ligi Kuu walilotwaa wiki chache zilizopita wakishinda mataji yote mawili kwa misimu mitatu mfululizo
Mafanikio haya yameingiza fedha za maana katika akaunti ya Yanga fedha ambazo pasipo na shaka zinawapa jeuri mabosi wa Yanga na pengine cheche zake zitaonekana katika dirisha la usajili
Ubingwa wa Ligi Kuu msimu huu umeihakikishia Yanga kuvuna jumla ya Tsh Milioni 600 ambapo Milioni 100 zimetoka kwa wadhamini NBC na Milioni 500 zikitoka kwa Azam Media
Lakini pia ubingwa huo umeipa tena Yanga kiasi cha Sh 150 milioni kutoka kwa wadhamini wao wakuu, kampuni ya SportPesa kwenye mkataba wao, makubaliano ya Yanga na kampuni hiyo ni kwamba kama itatwaa ubingwa itapewa bonasi ya kiasi hicho cha fedha.
Hatua ya kulichukua taji la CRDB inaifanya Yanga ivune tena kiasi cha Sh 112 milioni kutoka kwa wadhamini wao hao wakuu wa SportPesa
Ubingwa huo wa shirikisho pia unaifanya Yanga imevuna Tsh Milioni 200 kutoka kwa Wadhamini wakuu wa michuano hiyo, CRDB Bank
Yanga pia iliingia mkataba binafsi wa maudhui na matangazo ya televisheni na Azam Media ambao kwa hatua ya kuchukua ubingwa tu imejihakikishia kiasi cha Sh 1.1B
Pia kuna makusanyo kutoka Ligi ya Mabingwa ambapo Yanga imevuna takribani Bilioni 2.3 baada ya kufika robo fainali
Yanga imevuna zaidi ya Sh4.5 Bilioni kutoka kwa wadhamini mbalimbali na hii ni nje ya fedha za mapato ya mauzo ya jezi, GSM na usajili wa mashabiki na wanachama
