Daktari wa Yanga Dk Moses Etutu amesema wachezaji wote wako tayari kwa mchezo wa fainali ya kombe la Shirikisho la CRDB dhidi ya Azam Fc utakaopigwa Jumapili
Etutu amesema wachezaji Jonas Mkude na Joseph Guede waliokuwa changamoto za maradhi wote wako tayari na wameungana na wachezaji wenzao
Etutu amesema wachezaji hao wanashiriki mazoezi na wachezaji wenzao baada ya kikosi kufika Zanzibar.
"Kwa ujumla wachezaji wote hali zao kiafya ni wazima, tumekuwa na wachezaji wawili (Mkude, Guede) ambao walikuwa na shida kidogo kama kuumwa malaria na homa lakini wameanza mazoezi vizuri"
"Hali ya hewa hapa ni upepo na kibaridi kidogo kulinganisha na Dar es Salaam, lakini sidhani kama hali hii itabadilisha mabadiliko ya kimwili kwa wachezaji, pengine inaweza kutusaidia kupunguza uchovu na kuwafanya wachezaji wasichoke mapema, hivyo ni hali ya hewa nzuri na haina madhara kwa wachezaji," alisema Etutu
Yanga ilitua Zanzibar jana na moja kwa moja kuanza maandalizi ya mchezo dhidi ya Azam Fc utakaopigwa Jumapili katika uwanja wa New Amaan Complex
