Hatukufahamu kama Lwandamina ameondoka - Nsajigwa

Kocha Msaidizi wa Yanga Shedrack Nsajigwa amesema hakuna aliyekuwa na taarifa juu ya kuondoka kwa kocha George Lwandamina na kwamba taarifa ya kuondoka kwake wameipokea kama 'suprise'.

Akizungumza na waandishi wa Habari jana baada ya mchezo dhidi ya SIngida United uliomalizika kwa sare ya bao 1-1, Nsajigwa amesema kwa kiasi fulani tukio hilo limeathiri saikolojia ya wachezaji kuelekea mchezo huo.

"Hata kwenye familia mmoja wenu akipungua ambaye alikuwepo kwa mfano baba lazima kuna vitu havitakuwa sawa," alisema Nsajigwa.

Akizungumzia mchezo huo, Nsajigwa alisema Yanga ilihitaji kushinda, sare imekuwa ni matokeo tu lakini lengo kuu lilikuwa ni ushindi.

Amewapongeza wachezaji wa Yanga kwa juhudi zao za kusaka bao la ushindi hasa kwenye kipindi cha pili.

Nsajigwa amesema Singida United ni miongoni mwa timu bora msimu huu, ina kocha bora na wachezaji wenye hadhi sawa na wale walio kwenye vilabu Yanga, Simba na hata Azam FC.

Nae nahodha wa Yanga Nadir Haroub amesema sasa wanaelekeza nguvu zao kwenye mchezo wa marudiano kombe la Shirikisho dhidi ya Wolaitta Dicha.

Nadir amesema wanafahamu wana kazi kubwa ya kutetea ubingwa baada ya mchezo huo wa marudiano. Hivyo watajipanga kuhakikisha wanapata ushindi April 29 watakapokutana na Simba.