Yanga imetetea taji lake la ligi kuu kwa msimu wa tatu mfululizo baada ya ushindi wa mabao 3-1 dhidi ya Mtibwa Sugar katika mchezo uliopigwa uwanja wa Manungu
Mtibwa Sugar walitangulia kupata bao kupitia Charles Ilanfya mapema katika kipindi cha kwanza hata hivyo ubora wa Yanga ukaamua mechi kwenye kipindi cha pili kwa mabao ya Kennedy Musonda, Clement Mzize na bao jingine likiwa la kujifunga mlinzi wa Mtibwa Sugar
Akizungumza baada ya ubingwa huo wa 30, Kocha Mkuu wa Yanga Miguel Gamondi amewapongeza wachezaji na uongozi bila kuwasahau mashabiki ambao wamekuwa bega kwa bega na timu tangu mwanzo wa msimu
Gamondi amesema wamedhihirisha kwa vitendo kuwa timu bora Tanzania wakizifunga timu zote 15 zinazoshiriki NBC Premier League msimu huu
"Nawapongeza wachezaji, viongozi pamoja na Wananchi wote kwa ubingwa huu. Haikuwa rahisi lakini kwa umoja wetu na ushirikiano, tumefanikiwa"
"Tumekuwa mabingwa tukiwa mechi tatu mkononi lakini pia tumezifunga timu zote 15 zinazoshiriki ligi tukiwa timu iliyoshinda mechi zote nyumbani mpaka sasa"
"Ni ni rekodi na heshima kubwa kwangu huu ukiwa msimu wa kwanza. Haya ni mafanikio ya Yanga kama timu na sio mimi tu," alisema Gamondi
Wananchi wameanza shamrashamra katika uwanja wa Manungu. Sherehe kubwa itakayoambatana na Parade la Ubingwa itafuatia...!
