Msimu huu Yanga imekuja na mtindo tofauti katika kunogesha utani dhidi ya wapinzani wao wa kihistoria, klabu ya Simba
Baada ya kuwanyoosha mabao 5-1 katika mchezo wa duru ya kwanza ligi kuu ya NBC, mabango yalitapakaa kila kona ya jiji la Dar es salaam na hata majiji mengine kama Mwanza, Arusha na visiwani Zanzibar
April 20 Yanga ikaongeza ushindi mwingine wa 2-1 katika mechi ya pili ya ligi msimu huu, Ali Kamwe akarejea tena kuwakera Simba kwa mabango ya 7-2 yaliyowekwa maeneo mbalimbali ya jiji la Dar es salaam
Sasa kuna kubwa zaidi linakuja! Mapema leo msemaji wa Yanga Ali Kamwe alidokeza kuwa kuna usajili wa mchezaji mmoja utambulisho wake utakuwa wa kihistoria
Nyota huyo atatambulishwa maeneo ya katikati ya jiji la Dar es salaam (Kariakoo) ambapo Yanga itakodisha eneo katika jengo linaloangaliana na jengo la klabu moja maarufu nchini na kisha kuweka bango lenye sura ya mchezaji huyo
Bango hilo litakaa katika eneo lake kwa miezi sita, kwa maana kila watakapokuwa katika jengo lao watakuwa wakisabahiana na picha ya aliyekuwa mchezaji wao!
Tetesi tayari zimeanza kuvuma huko mitaani, Kamwe amewaambia Wananchi 'wanywe mtori, nyama watazikuta chini...!'
