Leo Makao Makuu ya klabu ya Yanga kulikuwa na tukio maalum lililoandaliwa na uongozi wa Yanga kwa ajili ya kuwashukuru na kuwapongeza Wazee wa klabu hiyo kwa kuhakikisha wametimiza vyema wajibu wao katika ile mechi ya dabi dhidi ya watani
Ni takribani siku 10 zimepita tangu Yanga iibuke na ushindi wa mabao 2-1 dhidi ya Simba katika mchezo ambao Yanga iliwakabidhi Wazee 'Wazee Derby'
Makamu wa Rais wa Yanga Arafat Haji amesema hafla hiyo ni maalum kwa ajili yao Wazee na uongozi unawapongeza, kutambua na kuthamini mchango wao
"Tumewaita wazee wetu leo kwa lengo la kuwashukuru lakini kuwaonyesha umuhimu wenu kwa Klabu hii. Tumekuwa na kawaida ya kuwaita tunapotafuta ushindi, hatuwezi kuwasahau pale ambapo ushindi umepatikana. Tukiachana na ushindi lakini tunaamini pia sisi kama vijana tunahitaji hekima zenu wazee. Nyie ndio nguzo iliyoshikilia maendeleo ya Klabu hii," alisema Arafat
Rais wa Yanga Injinia Hersi Said aliwashukuru Wazee kwa kuendelea kuwa bega kwa bega na uongozi wake na kuitikia wito pale walipohitajika
Hersi alitoa zawadi kwa wazee hao pia akiwapa ofa ya kushuhudia mchezo wa robo fainali kombe la Shirikisho la CRDB dhidi ya Tabora United utakaopigwa usiku wa leo katika uwanja wa Azam Complex
Wazee wameandaliwa usafiri wa kuwapeleka Azam Complex na kuwarudisha baada ya mchezo huo ambao Yanga inasaka tiketi ya kutinga nusu fainali
