Mkufunzi wa Yanga Miguel Gamondi amesema katika kila mechi huandaa timu yake kwa ajili ya kupigania alama tatu bila ya kujali idadi ya mabao ambayo watafunga
Kocha huyo kutoka Argentina amebainisha kuwa hakuna mechi walipanga kushinda mabao matano lakini walifunga idadi hiyo ya mabao kutokana na makosa yaliyofanywa na wapinzani wao
Gamondi alitoa kauli hiyo juzi baada ya mchezo wa ligi kuu dhidi ya Coastal Union ambao Yanga iliibuka na ushindi wa bao 1-0
Katika mchezo huo Yanga ilitengeneza nafasi nyingi lakini wananchi walitumia nafasi moja tu kupitia kwa Joseph Guede
"Hatujawahi kutoka kambini tukasema tunakwenda kuwafunga wapinzani mabao matano, kushinda mabao mengi inategemea na makosa gani mpinzani ameyafanya dhidi yetu"
"Tuna staili ya soka letu namna ya kutafuta ushindi, kitu muhimu kwetu ni kushinda kwa kupata pointi tatu na kucheza soka la kuvutia"
"Angalia mechi dhidi ya Coastal Union, ingewezekana kushinda mabao mengi, wapinzani wetu walijua wanakuja kukutana na timu gani wakaamua wote kucheza nyuma ya mpira bado haikuwa shida tulitawala mchezo na kutengeneza nafasi nyingi za kufunga"
"Bahati yao ni kwamba langoni walikuwa na kipa mzuri ambaye sio vibaya tukimpongeza kwa kufanya kazi kubwa, kinyume cha hapo tungeweza pia kutengeneza ushindi mkubwa, kitu muhimu malengo yetu ni kushinda na tumefanikiwa," alisema Gamondi
Kikosi cha Yanga kimerejea mazoezini kwa ajili ya maandalizi ya mchezo wa robo fainali kombe la Shirikisho la CRDB dhidi ya Tabora United utakaopigwa Jumatano, May 01 katika uwanja wa Azam Complex
