Rais wa Yanga Injinia Hersi Said amesema malengo ya mabingwa hao wa Tanzania Bara msimu ujao ni kuona wanakuwa miongoni mwa timu nne bora barani Afrika na kupata nafasi ya kushiriki michuano ya kombe la Dunia la klabu
Akizungumza katika mahojiano na Bongo Fm mapema leo, Hersi amesema kwa sasa Yanga ndio klabu bora hapa Tanzania na hilo wameridhihirisha msimu huu
"Kwa sasa hakuna Klabu Tanzania inayoweza kuisogelea Yanga kwenye ubora. Ndio maana timu nyingi zikicheza na sisi zinakuja na mfumo wa kuzuia zaidi ikimaanisha wanaiheshimu Klabu yetu"
"Malengo yangu makubwa ni kuhakikisha Klabu yetu inakuwa moja ya Klabu bora Afrika. Na matamanio yangu ni kuona mwakani kwenye mashindano ya Kimataifa tufike katika orodha ya timu nne bora AFRIKA, ili tuweze kushiriki Kombe la Dunia la Vilabu. Mwaka jana tumefika fainali na tumepata alama nyingi ambazo zitatuongezea nguvu ya kushiriki Kombe hilo," alisema Hersi
Hersi amesema wataendelea kufanya maboresho ya kikosi kwa kuzingatia mahitaji na jambo muhimu ni kutengeneza mazingira mazuri ya kuwavutia wachezaji bora
"Usajili ni sanaa, ni lazima ujue kwanini unafanya huo usajili. Kwa kifupi huwezi kubaki na wachezaji wako wazuri kwa muda wote, hivyo inabidi utengeneze mazingira mazuri ya kuvutia Wachezaji wengine wazuri"
"Hivyo nilichukua maamuzi ya kusimamia mchakato wa usajili. Unapokuwa Kiongozi lazima uwe na maono makubwa sana na uelewa mkubwa wa mpira"
"Unapaswa kujua mchezaji yupo kwenye kilele cha ubora wake, anapata wakati mgumu kuzuoea mazingira, amechoka nk. Usipokuwa na uelewa wa mpira basi utajikuta unasajili hovyo au unatimua wachezaji kwa hisia," alisema
