Kikosi cha Yanga kimekuwa na siku nne za maandalizi ya mchezo wa ligi kuu dhidi ya Simba ambao utapigwa kesho Jumamosi katika uwanja wa Benjamin Mkapa
Unaweza kusema siku ya kesho ndio ile siku ya kukata mzizi wa fitina na kumaliza tambo za takribani wiki nzima
Yanga wakiwa vinara wa ligi kuu wanafahamu ushindi dhidi ya watani zao Simba utawasogeza karibu na ubingwa wa 30
Kocha Mkuu wa Yanga Miguel Gamondi ataingia katika mchezo huo akiwa na kikosi chake kamili, ni jukumu lake kuamua nani amtumie katika mchezo huo
Wachezaji wote wameshiriki mazoezi katika siku hizi nne zilizopita na pengine baada ya mazoezi ya mwisho leo, Gamondi atafahamu nyota wake 20 atakaowapa jukumu la kuilinda heshima ya Yanga pale dimba la Mkapa
Pamoja na kupata ushindi mnono wa mabao 5-1 katika mchezo wa kwanza, Yanga imechukua tahadhari kubwa kuelekea mchezo huo
Mechi ya dabi ya Kariakoo ndio mechi kubwa zaidi ya soka Tanzania, wakati mwingine mechi hii hukumbwa na mambo mengi yakiwemo masuala ya nje ya uwanja
Ndio maana viongozi wamechukua tahadhari kubwa ikiwa ni pamoja na kuimarisha ulinzi pale Avic Town
Zitakuwa dakika 90 ngumu lakini jambo la uhakika ni kuwa Gamondi amekiandaa kikosi chake kwa ajili ya kupambana na kupata ushindi siku ya Jumamosi
