Dicha wamvulia kofia Ninja

Habari ya Yanga kumkosa beki wake, Kelvin Yondani kwenye mchezo wa Kombe la Shirikisho Afrika, ilishtua mashabiki wa mabingwa hao watetezi wa Ligi Kuu Bara, lakini kocha George Lwandamina, akawashusha presha.

Lwandamina alimwangalia kwa makini beki Abdallah Shaibu ‘Ninja’ kisha akasema huyu ataziba pengo la Yondani na kuanza kumfua na juzi Jumamosi, Ninja akathibitisha si mtu wa kuchezea pale aliposhirikiana na Andrew Vincent ‘Dante’ kuweka ukuta wa maana.

Hiyo ilikuwa mechi yake ya kwanza ya kimataifa kwa Ninja tangu asajiliwe kutoka Taifa Jang'ombe ya Zanzibar.

Sasa yule straika matata wa Welaytta Dicha, Mtogo Arafat Djako amempigia saluti kwa kusema jamaa ni bonge la beki.

“Yanga wamecheza vizuri sana hasa sehemu ya beki na winga. Mchezaji ambaye alitupa wakati mgumu ni yule beki wa kati mrefu si yule mwenye rasta ni yule namba 6 nafikiri (Ninja). Alicheza vizuri na amechangia kuharibu mipango yetu,” alisema Djako.

wa upande wa beki wa kati wa Welaytta, Bzabih Melayu alisema: “Yanga ni wazuri hivyo tunakwenda kujifua ili kuhakikisha hatufanyi makosa, kwetu tutawafunga kwetu bila wasiwasi.”

Katika mchezo huo, Yanga walishinda mabao 2-0 na watacheza tena mechi ya maruadiano nchini Ethiopia Aprili 18.

Mwanaspoti