Katika Mkutano na Wanahabari jana, Meneja wa Habari na Mawasiliano klabu ya Yanga Ali Kamwe alitangaza kuwa wamewakabidhi Wazee mchezo wa ligi kuu dhidi ya Simba ambao utapigwa Jumamosi, April 20 katika uwanja wa Benjamin Mkapa
Kwa wale waliosoma Cuba nafikiri walielewa alimaanisha nini! Wakati huu Wananchi hawataki yale ya msimu uliopita yajirudie
Ilikuwa April 16 siku kama ya leo pale uwanja wa Benjamin Mkapa Yanga wakati huo ikinolewa na Kocha Nasreddine Nabi ilipoteza alama zote mbele ya Simba kwa kufungwa mabao 2-0
Ni Yanga iliyokuwa bora kwelikweli, iliyokuwa ikifunga kila timu katika michuano ya kombe la Shirikisho ambayo Wananchi waliweza kufika fainali
Lakini mambo yalikuwa tofauti katika mchezo huo, wachezaji walikuwa wazito na hata wao hawakuelewa nini kilitokea
Wapo wanaoamini kuwa Wazee wa upande wa pili walifanya kazi yao vyema kwani siku ya mechi tangu asubuhi ilipiga mvua mwanzo mwisho
Wakati huu Yanga haitaki yajirudie ya msimu uliopita. Licha ya kushinda mabao 5-1 katika mchezo wa duru ya kwanza, Wananchi wanafahamu mechi ya April 20 ni mechi mpya na itakuwa ngumu
Lazima maandalizi kabambe yafanyike pale Avic Town lakini pia ni lazima Wazee waingie kazini kupambana na Wazee wenzao wa upande wa pili
Haya Mzee Mpili na wenzako mpira umeletwa mikononi mwenu...!
