Achana na kazi kubwa iliyofanywa na mwenye mechi yake, Mudathir Yahya Abas, Mamelodi Sundowns hawakufua dafu eneo la kiungo kutokana na kazi nzuri iliyofanywa na Jonas Mkude
Unaweza kusema mechi dhidi ya Mamelodi jana ndio mechi bora zaidi ambayo Mkude amecheza tangu aliposajiliwa na Yanga akitokea Simba
Huyu ndio Mkude ambaye amedumu kwenye soka la Tanzania kwa muda mrefu na kama ataendeleza hiki alichofanya katika mchezo dhidi ya Mamelodi, ni wazi kocha Miguel Gamondi hatakuwa na sababu ya kutompa nafasi katika mechi nyingine
Kukosekana kwa Khalid Aucho kulizua hofu kubwa kwa Wananchi kabla ya mchezo lakini baada ya dakika 90 hakuna aliyelalamika baada ya kumshuhudia Mkude akiwa katika kiwango bora kabisa
Matokeo haya ya suluhu ni faida kwa Yanga kuliko Mamelodi kwani yataongeza ari ya timu kuelekea mchezo wa marudiano utakaopigwa Ijumaa huko Afrika Kusini
Mtazamo wa wengi waliamini Yanga ingepoteza mchezo huo hasa kwa aina ya kikosi walichotumia
Lakini pia katika mchezo wa marudiano presha itakuwa upande wa Mamelodi kwa sababu kama Yanga itafunga bao ugenini maana yake Mamelodi watalazimika kufunga mabao mawili na idadi itaongezeka kwa kila bao ambalo Yanga watafunga
