Miaka ya nyuma kulikuwa ligi ya Muungano ambayo ilikutanisha timu za Tanzania Bara na Zanzibar, michuano hiyo inatarajiwa kurejea mwaka huu
Katibu Mkuu wa Shirikisho la Soka Zanzibar (ZFF), Hussein Ahmada Vuai, amesema kwa kuanzia watakuwa na timu nne, mbili kutoka Tanzania Bara na mbili kutoka Zanzibar
Klabu za Yanga na Simba zitaiwakilisha Tanzania bara na upande wa Zanzibar ni KMKM na KVZ. Upo uwezekano mkubwa wa derby ya Kariakoo kushuhudiwa visiwani Zanzibar
"Ni kweli Kombe la Muungano limerejea na kuanzia tutaanza na klabu nne, mbili kutoka Tanzania Bara na mbili kutoka visiwani Zanzibar,’’ alisema Vuai.
Vuai alizitaka klabu hizo kuwa ni Simba na Yanga kwa Tanzania Bara na KMKM na KVZ kwa upande wa Zanzibar. Hata hivyo, amesema kuwa kwa msimu huu wameanza na timu hizo, lakini mwakani wanatarajia kuongeza timu na kufikia nane, ambapo kila upande utatoa timu nne
"Mara hii tumeanza na timu hizo kutokana na ratiba kuwabana kwa kila upande ambapo wenzetu kutoka Tanzania Bara wanakabiliwa na mashindano ya kimataifa pamoja na kuwapo kwa AFCON kuliathiri ratiba za ligi na kuwa na viporo vingi"
Vigezo ambavyo wamevitumia katika kuzipata timu hizo ni kuchukuwa mshindi wa kwanza na wa pili wa msimu uliopita wa Ligi Kuu Bara na Visiwani na kwamba ratiba kamili itatolewa ili kujua nani atacheza nani ikiwa ni pamoja na kutangaza zawadi na mdhamini ambaye atadhamini michuano hiyo
Hata hivyo, amesema timu hizo zitacheza kwa mtindo wa mtoano na fainali itachezwa siku ya kilele cha sherehe za Muungano Aprili 26, mwaka huu.
