Maneno aliyosema Tshishimbi baada ya kutua Dar

Mwenyekiti wa Kamati ya usajili ya Yanga Hussein Nyika ndiye aliyefanikiwa kumleta Tanzania kiungo wa Mbabane Swallows Papi Kabamba Tshishimbi juzi.

Baada ya kutua mikononi mwa Yanga, Tshishimbi amesema kuwa anajisikia faraja na anaamini hatafanya kosa kujiunga na mabingwa hao wa kihistoria wa soka la Tanzania.

"Nafurahi kuja Yanga, ni sehemu ambayo itanipa changamoto mpya. Nilisikia kocha wao alikuja kunitazama na kuridhishwa na uwezo wangu, sina budi kuonyesha zaidi hapa," alisema kiungo huyo.

"Kwa kuwa walionyesha nia ya dhati ya kunisajili, nami nipo tayari kufanya kazi. Nafikiri tutakuwa na makubaliano mazuri katika kusaini hapa," alisema.

Aidha Nyika amesisitiza kuwa Yanga imedhamiria kusuka kikosi imara kitakachofanya vyema hasa kwenye michuano ya Kiamtaifa na Kamati yake ya usajili imesajili wachezaji kwa kufuata misingi hiyo.

"Nafikiri nimekuwa nikisema mara kwa mara, kamati yangu imedhamiria kukisuka kikosi chetu kwa umakini mkubwa, tukiyafanyia kazi mapendekezo ya makocha wetu na si kukurupuka kama wanavyofanya wengine," alisema.