Meneja wa habari na Mawasiliano klabu ya Yanga Ali Kamwe amesema Yanga iko tayari kucheza na yeyote katika hatua ya robo fainali ya michuano ya ligi ya mabingwa barani Afrika
Yanga ni miongoni mwa timu nane zilizotinga robo fainali ambapo droo ya hatua hiyo itafanyika Jumanne ijayo nchini Misri
Kulingana na mpangilio wa CAF, Yanga itapangwa dhidi ya timu iliyoongoza kundi A,B au C ambazo ni Mamelodi Sundowns, Asec Mimosas au Petro Atletico
Kamwe amesema timu zote ni bora ndio maana ziliongoza makundi hivyo watakuwa tayari kucheza na yeyote
"Katika hatua ya robo fainali sisi hatumuhofii yeyote. Tunatambua timu zote ambazo tuna nafasi ya kupangwa nazo ni nzuri ndio maana ziliongoza makundi yao"
"Kama ingekuwa ukiingia robo fainali unaruhusiwa kuchagua mpinzani wako basi yupo ambaye tungemchagua ili tumalize utata mapema"
"Lakini kwa utaratibu ulivyo, basi tunaisubiri droo hiyo tufahamu tutachuana na nani lakini kimsingi tutakuwa tayari kucheza na yeyote," alisema Kamwe
Katika timu zilizotinga robo fainali, Mamelodi Sundowns inaonekana kuhofiwa zaidi kutokana na ubora walioonyesha katika michuano ya msimu huu
Sundowns ndio, mabingwa wa AFL, michuano iliyofanyika Afrika kwa mara ya kwanza mwaka huu
