Yanga imekamilisha mechi 15 za duru ya kwanza ligi kuu ya NBC 2023/24 ikiwa kileleni mwa msimamo wa ligi na alama 40
Kwa mujibu wa takwimu, Kocha Mkuu wa Yanga Miguel Gamondi amefanya vizuri zaidi katika mechi 15 za kwanza msimu huu kuliko ilivyokuwa msimu uliopita wakati Yanga ikinolewa na Nasreddine Nabi
Katika msimu wa 2022/23, Yanga ilimaliza duru ya kwanza ikiwa kileleni mwa msimamo wa ligi ikiwa na alama 38 ambazo ni alama mbili pungufu ya alizokusanya Gamondi msimu huu
Aidha katika msimu huo Yanga ilipachika mabao 28 na kuruhusu mabao nane wakati kikosi cha Gamondi msimu huu kimepachika mabao 36 na kuruhusu mabao nane pia
Msimu huu Yanga imefunga mabao nane zaidi kulinganisha na mabao waliyofunga msimu uliopita baada ya mechi 15
Itoshe kusema Gamondi ameanza vyema majukumu yake na matarajio ya Wananchi ni kuipa Yanga mataji zaidi kama alivyofanya mtangulizi wake
