Mikwaju ya penati inavyoitesa Yanga

Kwa miaka ya hivi karibuni Yanga imekosa ufanisi linapokuja swala la changamoto ya mikwaju ya penati.

Ni kama Yanga imekuwa na 'bahati ndogo' au haina bahati kabisa kila inapofika katika hatua hiyo.

Nakumbuka wakati wa michuano ya Sportpesa msimu uliopita Yanga iliondoshwa kwenye mashindano hayo kwa mikwaju ya penati na AFC Leopards.

Ikaja kufungwa na Simba kwa mikwaju ya penati mchezo wa Ngao ya Jamii.

Kombe la Mapinduzi, Yanga ikatupwa nje kwa mikwaju ya penati na URA.

Ikabahatisha kuiondoa Ihefu FC kwa mikwaju ya penati kwenye raundi ya pili ya michuano ya kombe la FA.

Jana imerejea rekodi yake 'iliyozoea' kwa kuondoshwa na Singida United kwenye robo fainali ya michuano ya kombe la FA.

Yani kama ni ku-bet, odd za Yanga kwenye mikwaju ya penati zingekuwa ndogo sana kutokana na rekodi yake mbovu.

Bahati mbaya hakuna kocha wa kufundisha wachezaji kupiga mikwaju ya penati. Hili ni swala la kujiongeza kwa mchezaji mwenyewe.

Muhimu ni kwa benchi la ufundi kuwa na muda maalum kwa wachezaji kufanya mazoezi ya kupiga penati kila siku

Pia wachezaji wanapaswa waandaliwe kisaikolojia kabla ya kwenda kwenye matuta.

Kwa kuwa mara kwa mara Yanga imekuwa haifanyi vizuri inapokuja changamoto ya matuta, kwa wachezaji pia huenda imejengeka hofu kuwa 'hatuwezi'

Tatizo hili linasababisha wachezaji kukosa kujiamini na kujikuta wanakosa penati kwa urahisi.

Hapa haipaswi kuwalaumu wachezaji wanapokosa, jambo la msingi ni kuwapa moyo ili waweze kurekebisha makosa yao.

Kama tutaendelea na huu utamaduni wa kuwalaumu wachezaji wanapokosa penati basi tufahamu ipo siku timu haitakuwa na mpiga penati.

Wachezaji wote watalikwepa jukumu hilo ili kujiokoa na lawama.