Meneja wa kitengo cha Habari na Mawasiliano klabu ya Yanga Ali Kamwe amesema ujio wa mshambuliaji Joseph Guede utakwenda kumaliza changamoto katika safu ya ushambuliaji ya mabingwa hao wa Tanzania Bara
Yanga ilifunga dirisha dogo la usajili Januari 15 kwa utambulisho wa mshambuliaji huyo raia wa Ivory Coast aliyewahi kutamba na FAR Rabat, mabingwa wa Ligi Kuu ya Morocco
Kamwe ametamba kuwa Yanga haikukurupuka kumsajili Guede, walipata muda wa kumfuatilia na kujiridhisha kuwa anaweza kuwa mrithi wa Fiston Mayele aliyetimkia Pyramids Fc ya Misri
Kamwe amesema baada ya subira ya muda mrefu, Wananchi sasa wamepata mtu sahihi wa kurithi nafasi ya Mayele
"Lilikuwa ni ombi la muda mrefu la mashabiki wetu kupata Mshambuliaji mwenye uwezo mkubwa kama ambavyo ilikuwa kwa Fiston Mayele na uongozi kupitia ripoti ya kocha mkuu Miguel Gamondi umemleta Guede"
"Nataka niwaambie, Guede ni mshambuliaji aliyekamilika, anafunga na kutoa pasi za mabao pia. Pamoja na vipigo tulivyokuwa tukitoa, malalamiko kuhusu safu yetu ya ushambuliaji yalikuwa mengi"
"Kupitia usajili huu nawaonya wapinzani wetu kuwa waandae safu zao za ulinzi vizuri la sivyo ile kasi ya kuwapiga watu magoli mengi itaongezeka maradufu," alitamba Kamwe
Guede anakuja kuwaongezea ushindani Clement Mzize na Kennedy Musonda ambaye uko katika majukumu ya timu ya Taifa ya Zambia inayoshiriki michuano ya Afcon 2023
Ni wazi wapinzani wanapaswa kujipanga kwelikweli kukabiliana na Yanga pale michuano mbalimbali itakaporejea baada ya kumalizika Afcon 2023
