Ubingwa sasa ni lazima kwa Yanga

Baada ya kutolewa kwa matuta na Singida United kwenye mchezo wa robo fainali kombe la FA, Yanga sasa italazimika kutwaa ubingwa wa VPL kwa msimu wa nne mfululizo ili iweze kushiriki michuano ya Kimataifa mwakani.

Singida United imetumia faida ya kucheza nyumbani na kuibuka na ushindi wa penati 4-2 baada ya matokeo ya sare ya bao 1-1.

Yanga ikiwa na alama 46 sawa na Simba inayoshuka dimbani Jumanne kucheza mchezo wa kiporo dhidi ya Njombe Mji, haihitaji kufanya makosa mengi kwenye ligi ili iweze kuibuka mbele ya mahasimu wake.

Aidha matokeo haya yameongeza ushindani kwenye ligi baina ya Simba na Yanga na zaidi ukiwa mchezo baina yao utakaopigwa April 29, 2018.

Yanga bado ina nafasi muhimu ya kutinga hatua ya makundi ya kombe la Shirikisho barani Afrika kama itaibuka na ushindi dhidi ya Welayta Dicha katika michezo yote miwili.

Itaanzia nyumbani kwenye uwanja wa Taifa April 07 kisha kwenda kumalizia nchini Ethiopia April 17.

Aidha baada ya mchezo dhidi ya Welayta Dicha April 07, Yanga itarejeana tena na Singida United April 11 safari hii ikiwa ni mchezo wa ligi utakaopigwa katika uwanja wa Taifa.

Huu utakuwa mchezo wa kisasi kwa vijana wa George Lwandamina.