Kikosi cha Yanga kimeondoka alfajiri ya leo kuwafuata Medeama SC, huku kocha mkuu Miguel Gamondi akiweka wazi kuwa dakika 180 za mechi mbili za kwanza zimempa mwanga kuelekea mchezo dhidi ya Medeama siku ya Ijumaa ambao utakuwa kama fainali
Akizungumza kabla ya kuondoka nchini, Gamondi alisema Yanga bado ina nafasi lakini wana kazi ya kuhakikisha wanajiandaa vyema ili kuendana na ushindani uliopo katika mechi zilizosalia
Gamondi amezitaja mechi mbili zilizopita dhidi ya CR Belouizdad na Al Ahly kuwa zimemsaidia kubaini mapungufu ya kikosi chake na ana matumaini watakuwa bora zaidi katika mchezo dhidi ya Medeama
"Makosa tuliyoyafanya hayawezi kujirudia tulikuwa bora dhidi ya CR Belouizdad tukapoteza kwa idadi kubwa ya mabao tukatulia na kusawazisha makosa kwenye mchezo dhidi ya Al Ahly tumepata pointi moja. Mchezo unaofuata utakuwa mgumu lakini malengo ni pointi tatu," alisema
Gamondi amesema hakuna lisilowezekana kama watafanya maandalizi ya kutosha na kujiandaa vyema kuikabili Medeama, kila mchezo ulio mbele yao sasa ni fainali.
"Hatutakiwi kujiamini sana na kupelekea kufanya makosa kama tuliyofanya kwenye mechi mbili zilizopita. Naweza kukiri kuwa zimetupa darasa tutaingia kwenye mchezo ujao kwa tahadhari na kumuheshimu mpinzani"
"Hatua hii ni ngumu na kila timu ina malengo yake ya kuvuka hatua inayofuata, bado tuna nafasi ya kuvuka tukiwekeza nguvu huko na kuweka heshima mbele bila kujali tunakutana na nani" alisema Gamondi
Kikosi cha Yanga kimeondoka na msafara wa wachezaji 24 ambapo wanatarajiwa kutua Accra saa 10 jioni kisha kuunganisha kuelekea Mji wa Kumasi ambako mchezo dhidi ya Medeama utapigwa siku ya Ijumaa
