Mlinda lango Djigui Diarra jana hakuwa sehemu ya kikosi kilichoikabili CR Belouizdad katika mchezo wa kwanza wa ligi ya mabingwa kundi D
Diarra aliushuhudia mchezo huo ambao Yanga ilikubali kipigo cha mabao 3-0 akiwa jukwaani
Meneja wa Habari na Mawasiliano wa Yanga Ali Kamwe amesema Diarra anasumbuliwa na tatizo la bega
Kamwe amesema wanatarajia atakuwa tayari kuikabili Al Ahly katika mchezo unaofuata utakaopigwa uwanja wa Benjamin Mkapa Jumamosi Disemba 02
"Diarra ana tatizo la bega. Alipata majeraha kwenye mchezo dhidi ya Simba na hata mchezo dhidi ya Coastal Union hakucheza"
"Aliitwa timu ya Taifa lakini nako hakucheza kutokana na tatizo hilo. Madaktari walishauri apate muda wa kupumzika ili kuhakikisha anapona kabisa," alisema Kamwe
Kikosi cha Yanga kitaondoka Algeria baadae leo na kitawasili nchini Alfajiri ya kesho Jumapili
Kamwe amesema baada ya timu kurejea watakuwa na muda mfupi wa mapumziko kabla ya kurejea mazoezini kuanza maandalizi ya mchezo dhidi ya Al Ahly
