Baada ya mapumziko ya mwishoni mwa wiki, kikosi cha Yanga kimerejea mazoezini kujiandaa na mikiki mikiki ya hatua ya makundi ligi ya mabingwa barani Afrika
Wananchi ambao wako kundi D, wataanzia ugenini Novemba 24 nchini Algeria katika mchezo dhidi ya CR Belouizdad
Meneja wa Habari na Mawasiliano klabu ya Yanga Ali Kamwe amesema leo wachezaji wamefanya 'session' moja ya mazoezi Avic Town
Hata hivyo Kamwe amesema ipo changamoto inayotokana na idadi kubwa ya wachezaji kwenda kwenye majukumu ya timu za Taifa
"Tumeanza mazoezi Avic Town, leo tulikuwa na session moja ya mazoezi yakisimamiwa na kocha Miguel Gamondi na benchi la ufundi kwa ujumla"
"Tuna changamoto ya ratiba kwani wachezaji wengi wako kwenye majukumu ya timu za Taifa na pengine wengine tutaungana nao nchini Algeria"
"Mchezo wa mwisho wa kuwania kufuzu kombe la Dunia ni Novemba 21 na mchezo wetu dhidi ya CR Belouizdad utapigwa Novemba 24," alisema Kamwe
Wachezaji 11 wameondoka kwenda majukumu ya timu za Taifa ambapo nyota nane wako timu ya Taifa ya Tanzania 'Taifa Stars' huku Khalid Aucho akijiunga na Uganda, Stephane Aziz Ki (Burkina Faso) na Djigui Diarra (Mali)
Nyota walio kikosi cha Stars ni Aboutwalib Mshery, Metacha Mnata, Nickon Kibabage, Dickon Job, Bakari Mwamnyeto, Ibrahim Bacca, Mudathir Yahya na Clement Mzize
Kikosi cha Gamondi kilichobaki hakina golikipa kwani makipa wote wameenda kwenye majukumu ya timu za Taifa
