Kikosi cha Yanga kiko mkoani Tanga ambapo leo saa 12:30 jioni watashuka uwanja wa Mkwakwani kumenyana na Coastal Union katika mchezo wa ligi kuu ya NBC
Baada ya ushindi wa mabao 5-1 dhidi ya watani zao Simba kwenye mchezo uliopita, Yanga ina nafasi ya kuzidi kuchimbia kileleni mwa msimamo wa ligi leo kama itaibuka na ushindi
Hata hivyo hautakuwa mchezo mwepesi kwani Coastal Union haijawahi kuwa timu rahisi inapocheza na Yanga katika uwanja wa Mkwakwani
Katika Mkutano na Wanahabari jana, Kocha Mkuu wa Yanga Miguel Gamondi alisema vijana wake wako tayari kwa mchezo huo ambao wanatarajia utakuwa mgumu
Gamondi alisema licha ya Coastal Union kuwa na mwendo wa kusuasua msimu huu, lakini anafahamu leo watahamasika zaidi kwa kuwa wanacheza na Yanga
Gamondi alidokeza kikosi chake kitakuwa na mabadiliko machache, kuna wachezaji walipata majeraha kwenye mchezo uliopita dhidi ya Simba
Yanga ilitua mkoani Tanga juzi usiku na jana jioni wachezaji walipata nafasi ya kufanya mazoezi ya mwisho kwenye uwanja wa Mkwakwani tayari kwa mchezo huo
