Mshambuliaji Hafiz Konkoni bado hajaweza kuwapa raha mashabiki wa Yanga ambao ni wazi wanaendelea kumvumilia kwa sababu hana muda mrefu kikosini
Konkoni alisajiliwa kama mbadala wa Fiston Mayele aliyetimkia Pyramids ya Misri katika dirisha la usajili lililopita
Mayele alijijengea heshima kubwa Yanga, alikuwa mchezaji kipenzi cha mashabiki kwani alifanya vyema kazi ya kuziadhibu timu pinzani
Konkoni hajawa na mwanzo mzuri, mpaka sasa amefunga mabao mawili akifunga kwenye ligi kuu (dhidi ya KMC) na ligi ya mabingwa (dhidi ya Asas Fc)
Wakati mwingine imekuwa sio rahisi kwake kupata nafasi ya kucheza mbele ya Clement Mzize na Kennedy Musonda pamoja na kuwa zipo nyakati alikosekana kwa sababu alikuwa majeruhi
Konkoni alirejea tena kikosini katika mchezo wa ligi kuu dhidi ya Geita Gold uliopigwa jijini Mwanza kabla ya mapumziko ya FIFA
Katika mchezo huo ambao Yanga ilishinda mabao 3-0, aliingia kipindi cha pili kuchukua nafasi ya Mzize anayeonekana kuwa mshambuliaji chaguo la kwanza kwa sasa
Ni wazi mshambuliaji huyo raia wa Ghana ana kazi ya kuwashawishi Wananchi lakini kazi yake inaonekana ni kubwa zaidi kwa sababu amechukua nafasi ya mchezaji ambaye alifanya mambo makubwa sana
Konkoni ni mshambuliaji ambaye yawezekana bado hajafanikiwa kuingia kwenye mbinu za Kocha Miguel Gamondi kwani asili yake ni mshambuliaji anayependa kusimama kwenye eneo la hatari la timu pinzani
Master Gamondi yeye aanapendelea zaidi mshambuliaji ambaye anafanya majukumu zaidi ya kufunga awapo uwanjani
Mzize anaonekana kuwazidi wenzake kwa sababu anaposimama pale mbele, pia anaongoza 'pressing' kuhakikisha hawapi utulivu walinzi wa timu pinzani katika kuanzisha mipira kutokea nyuma
Pengine Konkoni nae anapaswa kubadilika ili kwendana na mahitaji ya kimbinu ya Gamondi kwani kwa umbile lake ziko mechi ambazo anafaa zaidi kutumika mbele ya Mzize na Musonda
Ni mshambuliaji asiye na mambo mengi uwanjani, ana nguvu na sio rahisi kumnyang'anya mpira anapouweka mguuni
