Kabla ya kuanza kwa mechi za hatua ya makundi ya michuano ya ligi ya mabingwa barani Afrika (CAF CL), dirisha la usajili la CAF linatarajiwa kufunguliwa kwa timu ambazo katika awamu ya kwanza ya usajili hazikutimiza wachezaji 40
Hii inaweza kuwa nafasi nyingine kwa Yanga kuimarisha kikosi zaidi kwa ajili ya mikiki mikiki ya kuanzia hatua ya makundi kwani katika awamu ya kwanza ya usajili Yanga iliandikisha wachezaji 29
Katika moja ya mahojiano yake baada ya mchezo dhidi ya Al Merrikh ambao Yanga ilikata tiketi ya kutinga makundi, Mkufunzi wa Yanga Miguel Gamondi alidokeza uhitaji wa maboresho kwenye maeneo machache
"Tunakwenda kushindana kwenye hatua ya makundi. Ili tuwe washindani bora zaidi ni wazi tutahitaji maboresho katika maeneo machache, hilo liko ndani ya mipango ya uongozi lakini kama kocha, wakati wote unahitaji zaidi"
"Pasipo na shaka, tunahitaji maboresho kidogo ili tuwe washindani bora zaidi dhidi ya timu kubwa," alisema Gamondi
Eneo ambalo Gamondi alilenga ni wazi ni katika safu ya ushambuliaji ambapo bado usajili wa Mghana Hafiz Konkoni 'haujawaka'
Katika mechi za karibuni Gamondi amewatumia zaidi Clement Mzize na Kennedy Musonda wakati Konkoni akipata dakika chache kwenye baadhi ya mechi
