Yanga kujipanga itinge makundi Shirikisho

Siku chache baada ya kutupwa nje kwenye michuano ya klabu bingwa Afrika, uongozi wa klabu ya Yanga umepanga kukutana na benchi la ufundi ili kuangalia sababu zinazopelekea kutofanya vizuri kwenye michezo ya nyumbani kwenye ushiriki wao wa michuano ya kimataifa.

Yanga Jumamosi iliyopita iliwabana wenyeji wao Township Rollers na kulazimisha suluhu, lakini ilikubali kipigo cha mabao 2-1 nyumbani kwenye michuano hiyo.

Kuondolewa huko kunaifanya Yanga sasa kutupwa kwenye michuano ya kombe la Shirikisho Afrika.

Akizungumza jijini Dar es Salaam jana, Mwenyekiti wa Kamati ya mashindano Hussein Nyika, alisema kuwa kamati hiyo leo itakutana na benchi la ufundi kufanya tathimini ya ushiriki wao.

"Bado tupo kwenye michuano ya kimataifa, lakini ni lazima tuangalie ni kwa nini tunakwama nyumbani kupata ushindi, tulicheza vizuri sana Botswana, vile tulivyocheza kule kama tungefanya hivyo hapa nyumbani tungesonga mbele," alisema Nyika.

"Tutakutana na benchi la ufundi, na tutaweka mikakati ili kuhakikisha tunafanya vizuri kwenye kombe la Shirikisho," alisema Nyika.

Aidha, alisema malengo yao kwenye michuano hiyo ni kufika hatua ya makundi.

"Kwanza lazima tufike hatua ya makundi, hayo ndio malengo, tunajipanga na baada ya kukutana na benchi la ufundi tutajua nini cha kufanya," alisema Nyika.

Nyika, alisema kwenye kikao hicho pia watapokea maoni ya kocha wao juu ya maandalizi ya ushiriki wa kombe la Shirikisho kama ataamua timu ikakae kambini au vinginevyo.