Kocha Mkuu wa Yanga Miguel Gamondi leo ana kazi ya kuamua wachezaji 11 ambao wataanza katika mchezo wa fainali Ngao ya Jamii dhidi ya Simba ambao utapigwa uwanja wa Mkwakwani
Gamondi anakabiliwa na mtihani huo kutokana na ubora wa kikosi chake. Katika kila nafasi Yanga ina wachezaji wawili ambao wanakaribiana ubora
Katika mchezo wa nusu fainali dhidi ya Azam Fc, Gamondi alianza na wachezaji wapya watatu Skudu, Maxi Nzengeli na Yao
Baadae Skudu alitoka baada ya kuumia na nafasi yake kuchukuliwa na Crispine Ngushi
Leo huenda Wananchi wakashuhudia mabadiliko katika baadhi ya nafasi ili kuongeza ubora zaidi katika mchezo huo wa fainali
Nyota wapya beki Gift Fred, mshambuliaji Hafiz Konkoni na kiungo mshambuliaji Pacome Zouzoua wanaweza kujumuishwa katika kikosi cha leo
Wachezaji hao hawakuwa sehemu ya kikosi kilichoikabili Azam Fc katika mchezo wa nusu fainali ambao Yanga iliibuka na ushindi wa mabao 2-0
Clement Mzize alikuwa na kiwango bora katika mchezo uliopita, haitashangaza leo kama Gamondi ataamua kumuanzisha na pengine Kennedy Musonda akaanzia winga ya kushoto nafasi ya Skudu ambaye majeraha aliyopata mchezo uliopita yanaweza kumuweka nje licha ya kuanza mazoezi mepesi
Hii ni mechi muhimu kwa Yanga kushinda ili kutetea Ngao ya Jamii kwa msimu wa tatu, matokeo ambayo yatadhihirisha umwamba wao mbele ya watani zao Simba
Yanga wametwaa Ngao mbili katika misimu miwili iliyopita kwa ushindi dhidi ya Simba, wakishinda leo utakuwa ushindi wa tatu mfululizo mbele ya watani zao hao
